Gjykata Themelore Shkupi 1 i caktoi masën e paraburgimit 30 ditor dados, e cila e tronditi opinionin vendas me videon në të cilën shihet sesi në mënyrë brutale keqtrajton foshnjën 9 muajshe.
Gruaja që ishte angazhuar si dado, për foshnjën është kujdesur 5 muaj të plotë.
Prindërit kishin filluar të dyshonin se diçka nuk ishte në rregull, pasi në trupin e foshnjës kishin vërejtur mavijosje. Për këtë shkak, babai kishte vendosur kamerë të fshehur në banesë. Derisa prindërit nuk kanë qenë në shtëpi, kamera ka regjistruar sesi dadoja keqtrajtonte pa kurrfarë arsye foshnjën. Videon në rrjetet sociale e ka publikuar tezja e foshnjës.
