Spanja do të lejojë fëmijët që të dalin për shëtitje nga vikendi i ardhshëm, në kuadër të zbutjes së masave të bllokimit që janë marrë për parandalimin e përhapjes së koronavirusit.
Këtë e ka konfirmuar Ministri i Shëndetësisë në Spanjë Salvador Illa të martën në mbrëmje, në mes të kritikave në rritje se kufizimet e qeverisë penalizojnë padrejtësisht fëmijët.
Ky ndryshim erdhi disa orë pasi qeveria fillimisht njoftoi se fëmijët, që e kanë të ndaluar të dalin nga shtëpitë e tyre në çfarëdo rrethane, do të lejohen që të shoqërojnë prindërit e tyre kur ata dalin për të blerë ushqim ose medikamente.
Kjo ka nxitur kritika të ashpra në rrjete sociale ku edhe u bënë thirrje që fëmijët të lejohen që të dalin jashtë për të luajtur. Madje, në gjithë Madridin u bënë protesta në ballkone me tenxhere dhe tiganë.
“Kjo është një qeveri që dëgjon dhe vikendin e ardhshëm unë do të nxjerr një urdhër që lejon fëmijët nën moshën 14 vjeçare të dalin për shëtitje nga e diela, 26 prill”, ka thënë Ministri i Shëndetësisë në një konferencë për media.
Ai pritet që të japë detaje se kur dhe ku mund të dalin fëmijët për shëtitje gjatë ditëve të ardhshme, transmeton Klan Kosova.
Edhe pse disa biznese janë lejuar të rihapen javën e kaluar, Spanja vazhdon të mbetet një nga vendet e Europës me masat më të ashpra të bllokimit ku miliona njerëz janë të mbyllur nëpër shtëpitë e tyre dhe nuk lejohen që të dalin jashtë, as për ushtrime.
Rënia e infeksioneve ka nxitur optimizëm te zyrtarët, por Ministri i Shëndetësisë ka thënë se vendi nuk është gati për lehtësim të masave të bllokimit.
Shifrat e 24 orëve të fundit kanë rritur numrin e vdekjeve në 21,282 dhe të të prekurve në 204,178 – një rritje prej 2 për qind. 399 vdekjet që janë regjistruar të hënën është shifra më e ulët ditore e regjistruar që nga 22 marsi.
