Shtyhet plani amerikan i paqes për Lindjen e Mesme
Ambasadori amerikan në Izrael, David Friedman, deklaroi sot se plani i administratës së tij për paqen në Lindjen e Mesme me shumë mundësi do të vonohet për t’u publikuar.
Në deklaratat dhënë pas takimit me këshilltarin e presidentit amerikan, Donald Trump, për çështjen e sigurisë, John Bolton, në Izrael, Friedman tha se publikimi i të ashtuquajturës “marrëveshja e shekullit” do të shtyhet për disa muaj.
“Marrëveshja e shekullit” është një plan amerikan për paqe në Lindjen e Mesme, detajet e të cilit ende nuk janë bërë publike.
Ky vendim u mor pasi Trump në fund të vitit 2017, njohu në mënyrë të njëanshme Jeruzalemin si kryeqytet të Izraelit, përcjell Atsh.
Lexo edheMbreti i Malajzisë heq dorë nga froni
Jeruzalemi mbetet në zemër të konfliktit të Lindjes së Mesme për shumë dekada, me palestinezët që pretendojnë që Jeruzalemi Lindor, i pushtuar nga Izraeli që nga viti 1967, të jetë kryeqyteti i shtetit palestinez.
