Rama ndërpret financimin e Akademisë së Shkencave të Shqipërisë

Kryeministri i Shqipërisë, Edi Rama, ka mbyllur “de facto” Akademinë e Shkencave të Republikës Shqipërisë duke i ndërprerë financimet për vitin 2018, ndërkohë që do të vazhdojë të financohet si më parë Qendra e Studimeve Albanologjike.

Shefi i Qeverisë shqiptare e ka quajtur Akademinë e Shkencave një lloj rudimenti sovjetik në Shqipëri. Sipas Ramës, Akademia e Shkencave vazhdon të jetë një institucion mbi çatinë e të cilit vazhdon të valëvitet flamuri sovjetik, shkruan sot “Koha Ditore”.

Të hënën në prezantimin e projektbuxhetit për vitin e ardhshëm ka thënë se ky institucion duhet t’i nënshtrohet një reformimi që nuk diktohet nga Qeveria. Investimet, sipas tij, do të shkojnë për kërkimet shkencore në Universitet. Buxheti i sivjetmë i AShSh-së ka qenë mbi 830 mijë euro.

“Ne nuk do të financojmë Akademinë e Shkencave. Ka një keqkuptim të madh pasi është ngritur në hava një akuzë se po i japim dërmën studimeve albanologjike…Jo. Nuk është e vërtetë. Qendra e Studimeve Albanologjike do të vazhdojë të financohet siç është financuar. Studimet albanologjike do të mbështeten drejtpërdrejt”, ka deklaruar kryeministri Edi Rama.

Zgjedhjet e reja për kryesinë e Akademisë së Shkencave të Shqipërisë të mbajtura në fillim të shtatorit, nxitën një debat të ashpër publik lidhur me reformimin e munguar të Akademisë së Shkencave.