Pesë përfaqësues të Listës Serbe janë ftuar nga Prokuroria Themelore në Mitrovicë që të paraqiten për intervistim në cilësinë e të pandehurve, në kuadër të një hetimi për veprën penale “Falsifikimi i dokumenteve”, raporton lajmi.net.
Bëhet fjalë për Igor Simiq, Ivan Zaporozhac, Ivan Todosijeviq, Zoran Todiq dhe Vasilije Tomasheviq, të cilëve u është dorëzuar ftesa për t’u paraqitur në Prokurorinë Themelore në Mitrovicë më 13 gusht.
Rastin për lajmi.net, e ka konfirmuar zëdhënësi i Prokurorisë Themelore në Mitrovicë, Valon Preteni, i cili bëri të ditur se ndaj pesë personave është duke u zhvilluar një procedurë hetimore.
“Mund të konfirmojmë që pesë (5) persona janë ftuar për intervistim në cilësinë e të pandehurve, për shkak të veprës penale ‘Falsifikimi i dokumenteve’. Rasti është në hetime”, deklaroi Preteni për lajmi.net.
Në këtë fazë, Prokuroria nuk ka bërë të ditura detaje shtesë lidhur me natyrën e dokumenteve që dyshohet se janë falsifikuar apo rrethanat në të cilat ka nisur hetimi.
Intervistimi i pesë zyrtarëve të Listës Serbe pritet të zhvillohet më 13 gusht, ndërsa pas marrjes së deklaratave të tyre pritet të vendosen hapat e mëtejmë proceduralë në këtë çështje.
Rasti mbetet në fazën e hetimeve dhe autoritetet nuk kanë dhënë informacione të tjera lidhur me dosjen. /Lajmi.net/
