Komisioni për Legjislacion diskutoi sot për konkursin për drejtor të Agjencisë Kundër Korrupsionit, ku u bë e ditur se deri tani kanë aplikuar 29 kandidatë.
Komisioni caktoi anëtarët që do të merren me procedurat e konkursit dhe intervistimit. Ndërsa, u tha se do të ndahet një ditë e plotë në mënyrë që të arrihet të intervistohen të gjithë kandidatët që janë lajmëruar në konkurs, të cilët synojnë të plotësojnë kriteret për të udhëhequr agjencinë.
Gjithashtu, anëtarët e komisionit bënë të ditur se të premten do të bëjnë një vizitë në këtë agjenci.
Mandati i drejtorit aktual të agjencisë përfundon në shtator, dhe sipas ligjit, i njëjti nuk ka të drejtë për ri-kandidim.
Ndërsa raporti vjetor i punës së vitit 2015, i Komisionit Qendror të Zgjedhjeve nuk arriti të shqyrtohej sot në Komisionin për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit, meqë kryetarja e KQZ-së është jashtë vendit. Komisioni vendosi që raportin ta shqyrtojë në njërën nga mbledhjet e ardhshme derisa miratoi disa raporte tjera.
Në mbledhjen e sotme të komisionit për Legjislacion, po ashtu u aprovuan edhe amendamentet e projektligjit për kundërvajtje. Gjithashtu, komisioni shqyrtoi raportin me amendamente të komisionit funksional për ndryshimin dhe plotësimin e Ligjit për Aftësim, Ri-aftësim profesional dhe Punësim të Personave me Aftësi të Kufizuara.
Në këtë mbledhje u bë edhe shqyrtimi i raportit me amendamente i Komisionit funksional në projektligjin për regjistrimin dhe ofrimin e shërbimeve dhe masave për punësimin e të papunëve.
