Zyra për Informim e Presidentit të Kosovës ka njoftuar për takimet që presidenti Thaçi do të ketë me kryetarët e tri partive më të mëdha.
Presidenti do të takohet së pari me kryetarin e VV-së, Albin Kurti, më pas me kryetarin e LDK-së, Isa Mustafa, dhe me atë të PDK-së, Kadri Veseli, raporton Gazeta Express.
“Presidenti i Republikës së Kosovës, Hashim Thaçi, sot pret në takime të ndara konsultative kryetarët e tri subjekteve më të mëdha politike. Në orën 10:00, presidenti Thaçi e pret në takim konsultativ Kryetarin e Lëvizjes Vetëvendosjes, Albin Kurtin. Në orën 10:30, presidenti Thaçi e pret në takim konsultativ Kryetarin e Lidhjes Demokratike të Kosovës, Isa Mustafën.Në orën 11:00, presidenti Thaçi e pret në takim konsultativ Kryetarin e Partisë Demokratike të Kosovës, Kadri Veselin”, thuhet në njoftimin e Zyrës së Presidentit.
Këto takime nuk do të mundë të mbulohen nga media për arsye të rekomandimeve shëndetësore si pasojë e koronavirusit.
“Si rrjedhojë e masave të ndërmarra kundër virusit COVID19 dhe rekomandimeve të personelit shëndetësor për ta ulur rrezikun, për shkak të hapësirës së papërshtatshme për dhjetëra gazetarë, fotografë e kameramanë në Zyrën e Presidentit, Departamenti i Informacionit dhe Komunikimit me Publikun do të përkujdesët që mediave t’ua dërgojë pamjet vizuale dhe fotografitë e këtyre takimeve”, thuhet në njoftim.
