Kurti u bën thirrje shqiptarëve të Luginës të votojnë për “Koalicionin Shqiptar”: Diskriminimi, përjashtimi dhe shtypja kërkojnë një përgjigje të vendosur demokratike

Kryeministri i Kosovës, Albin Kurti, u ka bërë thirrje shqiptarëve të Preshevës, Bujanocit dhe Medvegjës që të marrin pjesë në zgjedhje dhe të votojnë për “Koalicionin Shqiptar”, me numër 17.

Përmes një postimi të shoqëruar me video, Kurti ka rikujtuar takimin e mbajtur më 29 shtator me drejtuesit e subjekteve politike shqiptare, i cili, sipas tij, përfundoi me marrëveshjen për të garuar së bashku në një listë të përbashkët, transmeton lajmi.net.

Ai ka theksuar se shqiptarët e këtyre tri komunave kanë të drejtë të jetojnë në vendlindjen e tyre me mundësi të barabarta, duke kritikuar diskriminimin dhe përjashtimin me të cilat, sipas tij, përballen.

“Shqiptarët e Preshevës, Bujanocit dhe Medvegjës kanë të drejtë ta ndërtojnë jetën në vendlindje, me mundësi të barabarta”, ka shkruar Kurti.

Kreu i Qeverisë së Kosovës ka vlerësuar se përballë diskriminimit dhe shtypjes nevojitet një përgjigje demokratike përmes solidaritetit, këmbënguljes dhe pjesëmarrjes qytetare.

Duke iu drejtuar qytetarëve që kanë të drejtë vote në këto komuna, Kurti u ka bërë thirrje edhe shqiptarëve që ndodhen në Kosovë të udhëtojnë drejt vendlindjeve të tyre për të marrë pjesë në procesin zgjedhor.

“Nesër, është dita kur duhet të shprehni vullnetin tuaj. Përmes votës, secili e secila vendos për përfaqësimin, me kundërvënie si përgjigje”, ka deklaruar ai.