Nusja nga Kosova i jep fund karrierës, Lara Gut-Behrami tërhiqet nga skijimi: Nuk dua të jetoj me dhimbje!
Njëra prej skiatoreve më të suksesshme në historinë e Zvicrës, Lara Gut-Behrami, ka njoftuar zyrtarisht tërheqjen nga sporti profesionist, duke i dhënë fund një karriere të jashtëzakonshme që zgjati gati dy dekada.
35-vjeçarja, e cila është bashkëshortja e ish-futbollistit të Kombëtares së Zvicrës me prejardhje nga Kosova, Valon Behrami, e bëri të ditur vendimin përmes një video-mesazhi, ku shpjegoi se dëshiron ta mbyllë karrierën përpara se sporti t’i lërë pasoja fizike, shkruan Indeksonline
“Isha me fat dhe e privilegjuar që përjetova një karrierë shumë të gjatë dhe intensive. Ndjenja e lirisë absolute në dëborë nuk më ka lënë kurrë dhe do të mbetet gjithmonë me mua”, tha Gut-Behrami.
Ajo theksoi se, pavarësisht rrëzimeve dhe lëndimeve gjatë pothuajse 20 viteve në elitën e skijimit botëror, aktualisht nuk vuan nga dhimbje të vazhdueshme dhe dëshiron që kjo të mbetet kështu.
Lexo edheFenerbahce – Sturm Graz, ky është vendimi për Muriqin
“Kam qenë me fat që nuk kam dhimbje të përsëritura dhe nuk dua të kem asnjë. E di se ky është momenti i duhur. Nuk dua më ta detyroj trupin tim të përballojë ritme, stres dhe dhimbje vetëm për të vazhduar garimin”, u shpreh ajo.
Sipas saj, skijimi do të mbetet gjithmonë pjesë e jetës, por tashmë larg pistave të garave.
“Të detyroja trupin dhe mendjen time të përballonin dhimbjen do ta njolloste kujtimin e gjithçkaje që kam bërë me kaq shumë pasion. Besoj se çdo gjë në jetë ka momentin e vet, dhe tani e di se nuk është më momenti im për të veshur një numër gare. Mezi pres të shkoj për ski dhe ta shijoj atë ndryshe”, përfundoi kampionia zvicerane./Indeksonline/
