Ndërron jetë, Ali Ngucati – ushtari i orëve të para dhe bashkëluftëtari i Komandantit Adem Jashari (FOTO)

Pas një sëmundjeje  të rëndë, ka ndërruar jetë Ali Ngucati, ushtar i lirisë i orëve të para, bashkëluftëtar i Komandantit legjendar Adem Jashari dhe atdhetar i përkushtuar, i cili jetën dhe veprën e tij ia kushtoi lirisë dhe atdheut, përcjellë Drenica Press
Lajmin e dhimbshëm e ka bërë të ditur doktori i luftës dhe pasluftës Osman Veliu,  i cili ka kujtuar me emocione kohën e kaluar së bashku gjatë luftës, duke vlerësuar lart guximin, modestinë dhe gatishmërinë e Aliut për sakrificë në shërbim të vendit.
Osmani tha se “Kam pasur rastin ta kaloj një pjesë të luftës me Aliun, i cili karakterizohej nga guximi, gatishmëria për sakrificë e flijim, modestia dhe dashuria e pakushtëzuar për atdheun”, thuhet në kujtimin kushtuar të ndjerit.

Që në orët e para, kur atdheu thërriste për luftë dhe shpëtim të vendit, Ali Ngucati, ndonëse në moshë të re, u tregua i gatshëm të rrezikonte jetën dhe mirëqenien e tij për lirinë dhe dinjitetin e popullit shqiptar.

Ai kujtohet si një luftëtar besnik ndaj shokëve, i drejtë me njerëzit dhe i vendosur për të kontribuar edhe në rrethanat më të vështira. Vlerat që e karakterizuan gjatë luftës i dëshmoi edhe në paqe, përmes punës, ndershmërisë dhe përkushtimit ndaj vendit.