Kryetari i Komunës së Skenderajt, Bekim Jashari, nënkryetari Nuredin Lushtaku, drejtorë komunalë dhe disa asamblistë të Kuvendit Komunal, kanë marrë pjesë sot në tubimin përkujtimor në fshatin Polac, në nderim të 20-vjetorit të të rënëve për lirinë e vendit tonë.
Kryetari Jashari, para pjesëmarrësve, ku ishte i pranishëm edhe presidenti i Republikës së Kosovës, Hashim Thaçi, ka thënë se është obligim i ynë që të nderohen e të kujtohen dëshmorët dhe martirët e lirisë, pasi sakrifica e tyre na mundësuan lirinë dhe pavarësinë e Kosovës.
Kryetari Jashari ka bërë thirrje për unitet, kur janë në pyetje ndërtimi dhe e ardhmja e shtetit të Kosovës, pasi në këtë mënyrë arrihet të përmbushet amaneti i dëshmorëve të lirisë.
Pas këtij tubimi, delagacioni i Komunës së Skenderajt ka bërë homazhe te Kompleksi i Dëshmorëve në Marinë.
