Pasi nuk votuan Ligjin për Specialen reagon LDK: Ne nuk shantazhohemi e kërcënohemi pse kërkojmë drejtësi për viktimat- ndalni linçimet

Lidhja Demokratike e Kosovës është deklaruar në lidhje me mos-votimin e Ligji për Specialen enë lexim të parë, si dhe vendosjen e emrave të tyre bashkë me ata të Listës Serbe në një aktivitet nga aktivistët e PDK-së, jashtë institucioneve.

Nga LDK-ja u tha se vendosja e emrave të deputetëve të LDK-së në një rresht me deputetët e Listës Serbe, për shkak të qëndrimit tonë parimor, logjik e shtetar, është përpjekje e ulët për linçim publik dhe kërcënim politik.

Sipas LDK-,së mesazhi i tyre është i qartë se LDK-ja nuk shantazhohet.

“Mesazhi ynë është i qartë, LDK nuk shantazhohet. As me etiketime, as me kërcënime, as me përpjekje të tilla.Qëndrimi ynë buron nga përgjegjësia ndaj Kosovës. Ne nuk e mashtrojmë popullin me iniciativa që nuk prodhojnë efektin juridik që u premtohet qytetarëve. Nuk ushqejmë shpresa të rreme dhe nuk i përdorim dhimbjen e ndjenjat e njerëzve për përfitime politike. Çështje kaq të ndjeshme kërkojnë seriozitet juridik dhe koordinim me aleatët tanë”,thuhet në reagim.

“Po aq qartë, LDK nuk e braktis identitetin e vet ekzistencial. Jemi partia e Ibrahim Rugovës, e lirisë, e pavarësisë dhe e orientimit perëndimor të Kosovës. Jemi edhe partia e veprimtarëve të vrarë, familjet e të cilëve ende presin drejtësi. Askush nuk mund të na kërkojë ta harrojmë këtë pjesë të historisë sonë, aq më pak të na kërcënojë pse kërkojmë drejtësi”, thuhet tutje.