smet Munishi është një nga trajnerët më të mirë në Kosovë, ndërsa emri i tij është përmendur gjatë gjithë kësaj kohe në “Vala Superliga”, pasi tekniku nuk po drejtonte asnjë ekip që me largimin nga Feronikeli.
Tashmë i zyrtarizuar në stolin e Besës së Pejës, Munishi tregon për “Vip Sport” diferencat e futbollit mes Shqipërisë dhe Kosovës, por pa harruar të komentojë edhe afrimin e trajnerëve shqiptarë me futbollin në Kosovë.
Pas disa muajsh pushimi, jeni rikthyer për të marrë drejtimin e Besës së Pejës. Çfarë ju bindi në këtë projekt?
Në projektin e ri më ka bindur tradita e madhe e klubit dhe qytetit kampion të Pejës. Gjithashtu më ka bindur Shkumbin Gashi dhe kompania që pritet të zyrtarizohet si pronare në klubin tonë Besa.
Sezonin e ardhshëm do të jeni në Ligën e Parë dhe për shumë persona, kjo është cilësuar si një hap mbrapa. Ju vetë si e komentoni?
Unë jam Ismet Munishi dhe nuk i pranoj kritikat. Nuk lodhem asnjëherë që të dëgjoj ato çfarë fliten. Mund të them se jam shumë i privilegjuar që jam trajneri i Besës.
Në Superiore gjyqtarët janë thuajse gjithmonë kryeqendra e vëmendjes mediatike. Po në Kosovë, sa mendoni se ndikojnë gabimet me dashje të gjyqtarëve për të ndërhyrë në lojë? A mund të bëhet edhe Kosova si Shqipëria në këtë drejtim?
Ne jemi shembull për Shqipërinë, duke u nisur këtu nga arbitrimi, korrektësia, integriteti i ndeshjeve dhe tradita e profesionalizmit. Kemi pasur kampionatin më të rregullt edhe se Italia. Madje as arbitrimi nuk ka qenë keq.
Risia e këtij sezoni në “Vala Superliga” ishin trajnerët shqiptarë, por asnjëri prej tyre nuk arriti të triumfonte. Si e komentoni gjithë këtë bujë?
Të gjithë janë thuajse miqtë e mi dhe i konsideroj trajner cilësorë. Ata e kanë pasuruar futbollin shqiptar, por kanë pasur pak informata për “Vala Superligën”. Në sezonin që vjen do të jenë edhe më shumë dinjitoz, janë shumë të aftë në arsyetime.
A është kjo cilësia e tyre e vetme?
Jo ata kanë cilësi të tjera, por ky është specialiteti i tyre. (Qesh)
Feronikeli pas ikjes tuaj kaloi një periudhë negative, pasi kishte shumë ndeshje pa fituar. Kush mendon se është shkaku kryesor?
Ai klub ka ndërruar 4 trajnerë dhe 3 presidentë për një vetë. Futbollistët janë të dërrmuar duke u ndërruar filozofia e lojës. Nëse unë nuk munda ta nxjerrë kampion Feronikelin, atëherë nuk mundet as Guardiola.
Si e shihni të ardhmen e futbollit në Kosovë dhe ku mendoni se janë diferencat me Shqipërinë?
Shqipëria ka kualitet lojtarësh, por edhe financa të mira. Megjithatë për 3 ose 4 vite ne e tejkalojmë kampionatin shqiptar me kualitete dhe financa.
