Kryeministri i Kosovës, Albin Kurti, ka zhvilluar sot një takim lamtumirës me komandantin e KFOR-it, gjeneralmajorin Özkan Ulutaş, të cilin e ka falënderuar për bashkëpunimin dhe bashkërendimin gjatë dy mandateve të tij në krye të misionit të NATO-s në Kosovë.
Përmes një postimi, Kurti ka bërë të ditur se gjatë takimit kanë diskutuar për rrugën e Kosovës drejt anëtarësimit në NATO, zhvillimet aktuale politike dhe situatën e sigurisë në vend dhe rajon.
Temë e diskutimit ishte edhe ngritja e kapaciteteve të Forcës së Sigurisë së Kosovës dhe Policisë së Kosovës, si dhe mundësitë për zgjerimin dhe thellimin e bashkëpunimit ndërmjet institucioneve të Kosovës dhe KFOR-it.
Kurti ka vlerësuar se komunikimi me gjeneralmajorin Ulutaş gjatë dy mandateve të tij ka qenë konstruktiv, duke theksuar se ai largohet nga Kosova si mik.
“Në dy mandatet e tij të komandës së KFOR-it, komunikimi me Gjeneralmajor Özkan Ulutaş ka qenë konstruktiv, ndërsa ai largohet nga vendi ynë si mik me të cilin do të ruajmë kujtime të mira”, ka shkruar Kurti.
Kryeministri e ka falënderuar komandantin për bashkëpunimin dhe bashkërendimin, duke shprehur rëndësinë e vazhdimit të bashkëpunimit ndërmjet institucioneve të Kosovës dhe misionit të NATO-s.
