Ministri i ri i Ekonomisë dhe Ambientit dhe nënkryetari i AAK’së, Blerim Kuçi ka deklaruar se posedon aksione në dy biznese, kapitali i të cilave së bashku kap vlerën rreth 2 milionë euro. Përveç tyre Kuçi posedon edhe pasuri të paluajtshme që tejkalojnë shifrën prej 1 milion euro, shkruan Gazeta Metro.
Ministri i Ekonomisë dhe Ambientit, Blerim Kuçi posedon 100 për qind të aksioneve në dy biznese NPN ‘Hidroterm’ dhe ‘Hidroterm BK’ Doo, ku kapitali në dy bizneset së bashku shkon deri në 2 milionë euro.
Në deklarimin e pasurisë në Agjencinë Kundër Korrupsion për vitin 2019, Kuçi ka deklaruar se është pronar i 7 pronave të paluajtshme, ku hyjnë troje, lokale, shtëpi e banesa dhe të cilat kapin vlerën prej 1 milionë e 178 mijë e 800.
Përveç pasurisë së paluajtshme, Kuçi ka deklaruar edhe pronësinë e dy veturave, të cilat janë marka Mercedes Benz dhe BMW. Vlera e të parit është 65 mijë, ndërsa e BMW 25 mijë euro.
Në këtë LINK mund ta shikoni deklarimin e plotë të pasurisë në AKK.
Metro ka raportuar disa herë për kontratën milionëshe që Kuçi e kishte fituar në vitin 2019 në Suharekë, komunë që udhëhiqet nga bashkëpartiaku i tij Bali Muharremaj, raporton Gazeta Metro.
Në shtator të vitit 2019, kompania ‘Hidroterm’ që është pronë e Blerim Kuçit ka fituar kontratë për projektin për ‘Rregullimin e rrugës brigada 123 Qendër-Suharekë –Sheshi’në vlerë prej 1 milion e 740 mijë euro.
Përveç tenderit bazë, ministri i ri në fund të muajit mars të këtij viti kishte marrë edhe një tender për punë shtesë për projektin e njëjtë.
Në total ndërtimi për sheshin në Suharekë do të kushtojë 1,820,358 euro.
