Tri ligje e disa rregullore i ka shkelur Ministria e Infrastrukturës kur ka vendosur të hapë tenderin 110 milionë euro për autostradën e Gjilanit. Zyra ligjore e Zyrës së kryeministrit të Kosovës të premten ka nxjerrë opinion ligjor për hapjen e këtij tenderi 2 javë para se ish-ministri Pal Lekaj të përfundonte mandatin. Opinioni rekomandon anulimin e tenderit.
Mbi bazën e këtij opinioni, ministri i Infrastrukturës dhe Ambientit, Lumir Abdixhiku, i ka kërkuar sekretarit të kësaj ministrie, Betim Reçica që ta anulojë këtë procedurë tenderimi. I ka dhënë afat katër ditë.
Por pas disa orëve Reçica i është përgjigjur Abdixhikut. E ka cilësuar kërkesën e tij të paligjshme. Ka thënë se nuk do ta anulojë tenderin.
Se ka refuzuar të anulojë tenderin e ka konfirmuar Reçica për “Kohën Ditore” në orët e mbrëmjes të së premtes. Por ka kërkuar që për detaje t’i drejtohet me email. Gazeta i ka nisur pyetje, por ai nuk ka kthyer përgjigje.
Opinioni ligjor i ZKM-së përmend bazën ligjore që e ka shkelur MI-ja kur e ka hapur këtë tender. Thotë se është në kundërshtim me Ligjin e Prokurimit Publik. Në këtë ligj thuhet qartë se një procedurë tenderuese nuk mund të iniciohet pa u zotuar mjetet financiare të parapara për këtë tender.
MI-ja nuk i ka pasur të zotuara këto mjete.
“Pasi ZKA t’i ketë dorëzuar zyrtarit autorizues deklaratën e nevojave dhe vendosmërisë për dispozicionin e fondeve të përgatitur në mënyrë të rregullt dhe të nënshkruar nga ZKA-ja dhe ZKF-ja, zyrtari autorizues e autorizon zyrtarin e prokurimit që të iniciojë aktivitetin e prokurimit. Zyrtari autorizues e autorizon inicimin e aktivitetit të prokurimit përmes dorëzimit zyrtarit të prokurimit të një udhëzimi me shkrim për inicimin e aktivitetit të prokurimit së bashku me një kopje të deklaratës së nevojave dhe vendosmërisë për dispozicionin e fondeve të nënshkruara”, thuhet në paragrafin 2 të nenit 22 të Ligjit të Prokurimit Publik.
Zotimi i mjeteve parashihet edhe në Ligjin për Mbikëqyrjen e Financave Publike. Pjesa e shtatë e këtij ligji flet për zotimet, fondet e alokuara, fondet e zotuara, fondet e obliguara dhe shpenzimet. Neni 34 i këtij ligji përcakton se të gjitha mjetet duhet të zotohen kur bëhet fjalë për projektet e atij viti fiskal.
