Platforma qytetare “Liria ka Emër” ka njoftuar opinionin publik se ka siguruar lejen zyrtare nga Komuna e Prishtinës, për shfrytëzimin e hapësirës publike, me qëllim të organizimit të marshit qytetar me moton “Drejtësi jo politikë”.
Marshi, do të mbahet më 17 shkurt duke nisur nga ora 14:00 në hapësirën publike të miratuar nga autoritetet komunale dhe në përputhje të plotë me kërkesën e paraqitur nga organizatorët dhe me legjislacionin në fuqi, transmeton lajmi.net.
“Sipas dokumentit zyrtar të lëshuar nga Komuna, leja është dhënë për përdorimin e hapësirës publike në orarin e kërkuar, duke garantuar kështu mbarëvajtjen e aktivitetit qytetar në mënyrë paqësore dhe të rregullt”,thuhet në njoftim.
Po ashtu platforma “Liria ka Emër” u ka bërë thirrje qytetarëve të Prishtinës dhe mbarë Kosovës që t’i bashkohen këtij marshi paqësor, si shprehje e kërkesës për drejtësi të paanshme për ish-krerët e Ushtrisë Çlirimtare të Kosovës, të cilët po mbahen në paraburgim në Hagë për më shumë se pesë vjet.
“Ky marsh është një thirrje qytetare për respektimin e parimeve të drejtësisë, dinjitetit njerëzor dhe për ndarjen e qartë të drejtësisë nga politika”, shkruhet në Facebook./Lajmi.net/
