Vendimi i Qeverisë për dërgimin në Kuvend të projektligjit për Trepçën, i ka nxjerr në rrugë më shumë se 100 punëtorë të shkritores së Trepçës në Zveçan.
Rreth orës 14:00, këta punëtorë kanë bllokuar magjistralen Mitrovicë-Leposaviq, për të shprehur pakënaqësinë e tyre ndaj vendimit të Qeverisë së Kosovës, që projektligji për Trepçën të shqyrtohet në seancën e Kuvendit, që do të mbahet të premten.
Lajmin për protestën e ka konfirmuar për Gazetën Express, Besim Hoti, zëdhënës në Policinë e Mitrovicës së Veriut.
“Po mund ta konfirmoj se gjatë ditës së sotme rreth 100 persona, punëtorë të Trepçës, kanë protestuar në fshatin Rudarë, përkatësisht në magjistralen Mitrovicë-Leosaviq. Protesta ka zgjatur gjysmë ore dhe ajo ka përfunduar e qetë”, ka thënë Hoti.
Në protestë kanë marrë pjesë edhe kryetarët ilegalë të veriut të Mitrovicës, Aleksandar Spiriq, si dhe ai i Komunës së Zveçanit, Ivan Todosijeviq.
Protesta ka zgjatur rreth gjysmë ore, ndërsa nuk është shënuar ndonjë incident./GazetaExpress/
