Lautaro Martinez dhe Hakan Calhanoglu duket se kanë lënë pas përplasjen e tyre të hidhur, pasi mesfushori turk konfirmoi qëndrimin e tij te Interi dhe hodhi poshtë zërat për një transferim te Galatasaray.
Dyshja madje shkëmbyen një përqafim, një gjest që u ndanë edhe në rrjetet sociale, me Lautaron që publikoi një foto në Instagram ku të dy qeshnin dhe përqafoheshin.
Pak ditë më parë, Calhanoglu u bashkua me ekipin në stërvitje dhe përfundimisht i dha fund spekulimeve, duke sqaruar se, megjithëse kishte interes nga Galatasaray – skuadra që ai e ka mbështetur që fëmijë – asnjëherë nuk ka pasur marrëveshje reale me Interin apo me vetë lojtarin.
Përplasja mes dyshes nisi gjatë Kupës së Botës për Klube, ku Interi u eliminua nga Fluminense në raundin e 16-shes. Pas ndeshjes, kapiteni Lautaro Martinez dha një deklaratë të fortë për mediat:
“Kushdo që dëshiron të qëndrojë, le të qëndrojë. Kushdo që nuk e dëshiron Interin, le të largohet.”
Ai theksoi se kishte parë gjëra që nuk i pëlqyen brenda grupit dhe se, si kapiten, kishte detyrimin të fliste hapur:
“Nuk do përmend emra, por ne jemi këtu për të dhënë maksimumin. Kush nuk dëshiron të luftojë për trofe të rëndësishëm, atëherë lamtumirë.”
Kjo deklaratë interpretohej qartë si një mesazh për Calhanoglu, në mes të thashethemeve se ai po shtynte për një rikthim në Turqi.
Megjithatë, Calhanoglu dhe agjenti i tij më vonë pohuan se ai është i lumtur te Interi dhe nuk ka ndërmend të largohet. Ky pajtim publik mes dy liderëve të skuadrës është një sinjal pozitiv për klimën brenda ekipit, ndërsa Interi përgatitet për sezonin e ri me ambicie për të mbrojtur titullin./GazetaExpress/
