Kuvendi ka kaluar ditën e sotme ndryshimet në nenin 127, pikën 3 të Kodit Rrugor, specifikisht për pezullimin e patentës së shtetasve të huaj që bëjnë shkelje në territorin e Shqipërisë.
Sipas amendamentit të ri, të propozuar nga deputeti Pjerin Ndreu dhe të kaluar në Kuvend me 90 vota, emigrantët, turistët e huaj apo dhe qytetarët e Kosovës nuk do të presin më në rradhë për të marrë patentën e cila ju pezullohej nëse bënin shkelje në Shqipëri.
Në bazë të amendamentit të ri, shtetasit e huaj apo emigrantët që bëjnë shkelje në Shqipëri do ta paguajnë gjobën në vend dhe më pas do të vazhdojnë udhëtimin e tyre.
‘Amendamenti im per ndryshimin e nenit 127, pika 3 te Kodit Rrugor kaloi me 90 vota. Tashme emigrantet me patenta te huaja, shtetasit shqipetar te Kosoves dhe kudo ndodhen, si dhe turistet e huaj nuk do vuajne kalvarin e tmerrshem te pezullimit te patentes, por ne deshire te tyre do paguajne gjoben ne vend per shkeljen dhe do vazhdojne rrugen !
Falenderoj koleget deputete te pozites dhe opozites qe votuan per lehtesimin e kesaj procedure skandaloze qe ishte bere tmerri i cdo personi me patente te huaj !’, shkruan Pjerin Ndreu.
