Kadri Kryeziu, ish – nënkryetar i Gjykatës Kushtetuese, ka shprehur shqetësimin e tij lidhur me kërkesën që Presidentja Vjosa Osmani i ka dërguar Gjykatës Kushtetuese për sqarim mbi pasojat juridike në rast të mosrespektimit të afatit 30-ditor për konstituimin e Kuvendit.
Kryeziu vlerëson se kërkesa është dashur të bëhet shumë më herët dhe se veprimi i Presidentes në ditët e fundit krijon përshtypjen e taktizimit politik.
Ai e konsideron problematike edhe kërkesën e Osmanit për pezullimin e përkohshëm të afatit kushtetues, duke e cilësuar si “gabim, absurd dhe jashtë frymës së detyrës për të mbrojtur funksionimin kushtetues të institucioneve”.
Sipas tij, Gjykata Kushtetuese nuk ka asnjë autoritet të pezullojë një dispozitë që rrjedh drejtpërdrejt nga Kushtetuta, përkatësisht nga neni 66. Kryeziu e sheh këtë si një veprim të habitshëm nga ana e Presidentes.
Postimi i plotë:
Shqetësimet e mia me shkresën e Presidentes Osmani drejtuar Gjykatës Kushtetuese.
Presidentja Osmani i është drejtuar Gjykatës Kushtetuese për sqarime rreth pasojave juridike nëse nuk respektohet afati 30 ditor për konstituimin e Kuvendit.
Janë dy aspekte që më shqetësojnë:
1. Kërkesa për sqarime është dashur të niset shumë më herët. Nuk bën sens që Presidenti i Republikës të pres ditët e fundit, për ta bërë pyetjen që po e mundon një Kosovë të tërë. Kjo e lë shijen e keqe sikur edhe Presidentja ka taktizuar politikisht.
2. Presidentja Osmani, në kërkesën e dërguar në Kushtetuese, që ka të bëjë me zgjidhjen e konfliktit të kompetencave, ka paraqitur edhe kërkesën për masë të përkohshme për pezullimin e afatit 30-ditor të Kushtetutës.
“Kërkesa për masë të përkohshme është mundësi që të shmanget futja e institucioneve në një bllokadë pa fund, dhe hyrja në një situatë ku institucionet do të mund të konstituoheshin në një mënyrë jokzushtetuese dhe do të ishin të pasafatshme”, raportohet të ketë thënë ajo.
Kjo kërkesë është gabim, ësht absurd, dhe as nuk është në frymën e detyrës për të mbrojtur funksionimin kushtetues të institucioneve.
Gjykata Kushtetuese nuk e ka nxjerr afatin 30 ditor nga mendja, pra nuk e ka shpikur atë. Afati 30 ditor buron nga neni 66 i Kushtetutës, rrjedhimisht Gjykata Kushtetuese nuk ka asnjë autoritet ta pezullojë një gjë që del nga Kushtetuta. Është vërtet e habitshme, pse Presidentja e ka bërë këtë kërkesë./lajmi.net/
- Advertisement -
