Izraeli i ka dhënë Mbretërisë së Bashkuar 30 ditë afat për të mbyllur konsullatën e saj në Jerusalemin Lindor, në një masë hakmarrëse pas vendimit të Londrës, Francës dhe Kanadasë për vendosjen e sanksioneve ndaj vendbanimeve izraelite.
Kështu kanë bërë të ditur të mërkurën për Reuters dy zyrtarë izraelitë dhe dy burime të njohura me çështjen.
Konsullata britanike në Jerusalemin Lindor përfaqëson qeverinë e Mbretërisë së Bashkuar në Jerusalem, Bregun Perëndimor dhe Gazë për çështjet që lidhen me palestinezët. Prania diplomatike britanike në Jerusalem daton që nga viti 1839.
Diplomatët britanikë që punojnë në konsullatë do të humbasin gjithashtu statusin e tyre diplomatik brenda 30 ditësh, sipas zyrtarëve izraelitë dhe dy burimeve.
Ndërkohë, zyrtarëve britanikë të caktuar në një mision koordinues për Gazën, të udhëhequr nga Shtetet e Bashkuara në Izrael, si dhe diplomatëve britanikë me bazë në Ramallah, u janë dhënë shtatë ditë për t’u larguar, kanë thënë njëri prej zyrtarëve izraelitë dhe dy burimet.
Izraeli ka njoftuar gjithashtu se Mbretërisë së Bashkuar nuk do t’i lejohet më të trajnojë forcat palestineze të sigurisë në Bregun Perëndimor.
Po ashtu, 12 ligjvënësve britanikë dhe shtetasve të tjerë, përfshirë ish-liderin e Partisë Laburiste dhe kritikun e zëshëm të Izraelit, Jeremy Corbyn, do t’u ndalohet hyrja në vend.
Sekretari i Jashtëm britanik, Ed Miliband, ka thënë të mërkurën se i vinte keq për vendimin e Izraelit, por shtoi se urdhri për mbylljen e konsullatës nuk ishte befasi.
“Ne peshuam kostot dhe përfitimet e veprimit dhe menduam se thjesht nuk mund të qëndronim duarkryq, sepse kishim frikë nga veprimet e Izraelit”, ka thënë ai për BBC.
Një ditë më parë, Miliband ka deklaruar se Izraeli kishte “mbyllur sytë” ndaj dhunës së ushtruar nga kolonët kundër palestinezëve.
