Kosova do të fillojë procedurat për hapjen e ambasadës së saj në Abu Dhabi të Emirateve të Bashkuara Arabe, që nga java e ardhshme.
Kështu ka thënë ministri i Punëve të Jashmte të Kosovës, Behgjet Pacolli pas takimit me homologun e tij nga EBA, Sheikun Abdullah bin Zayed Nahyan, shkruan Periskopi.
Po ashtu, Pacolli ka thënë se me Zayed Nahyan ka biseduar edhe për anëtarësimin e Kosovës në Organizatat Ndërkombëtare, duke shprehur vullnetin për sinkronizim të punëve për anëtarësimin e Kosovës në INTERPOL, meqë samiti i Organizatës do të mbahet në Abu Dhbai.
Njoftimi i plotë i Pacollit:
Sapo përfundova një takim shumë miqësor më homologun tim nga Emiratet e Bashkuara Arabe, Ministrin e Jashtëm dhe Bashkëpunimit Ndërkombëtarë, Lartmadhërinë e Tij, Sheikh Abdullah bin Zayed Al Nahyan.
E falënderova për përkrahjen e vazhdueshme, që ata kanë bërë dhe po e bëjnë për Kosovën, jo vetëm në njohje, por edhe duke e përkrahur fuqishëm anëtarësimin e saj në Organizatat Ndërkombëtare.
Në funksion të kësaj, diskutuam edhe mbi sinkronizmin e punëve të përbashkëta për anëtarësimin e Kosovës në INTERPOL, ku samiti i radhës i kësaj Organizate do të mbahet në Abu Dhabi.
Mora premtimin për shtimin e angazhimit të tij edhe personal në çështjet, që ndërlidhen me forcimin e subjektivitetit dhe integrimit të mëtutjeshëm ndërkombëtarë të Kosovës.
Hapja e Ambasadës së Republikës së Kosovës në EBA, ishte temë tjetër diskutimi në aspektin politik dy-palësh dhe u dakorduam, që Ministria e Jashtme e Kosovës t’i fillojë procedurat e hapjes së Ambasadës së Kosovës në Abu Dhabi që nga java e ardhshme.
Në lidhje me çështjet e intensifikimit të bashkëpunimit ekonomik në mes dy vendeve, i bëra thirrje investitorëve potencial nga EBA për të investuar në Kosovë, gjë e cila është mirëpritur dhe vlerësuar nga bashkëbiseduesi.
