Komuna e Skenderajt i ka premtuar Drenicës se nuk do ta lë vetëm dhe se shumë shpejt do ta nxjerr në dritë prej krizës së madhe që e ka kapluar, e cila e ka lënë edhe pa kryesi. Këtë premtim klubit kuq e zi ia ka bërë drejtori për sport në Komunën e Skenderajt, Ramiz Shala, duke folur në emër të kryetarit të Komunës së Skenderajt, Bekim Jashari.
Në fakt, futbollistët dhe trajnerët e Drenicës janë takuar të mërkurën me Shalën në objektin e komunës, ku drejtori komunal i ka dëgjuar brengat e lojtarëve, të cilët nuk kanë marrë paga, kanë mbetur pa kryesi dhe pa e ditur të ardhmen e po ashtu sfidohen nga kushtet e vështira infrastrukturore, shkruan “Zëri”
Shala u ka premtuar kuqezinjve se Komuna e Skenderajt e ka një plan afatgjatë për klubin, ndërsa u ka premtuar lojtarëve se deri më 30 dhjetor do të shlyhen të gjitha borxhet ndaj tyre. Shala ka premtuar se komuna shumë shpejt do ta shtyjë përpara procesin e formimit të kryesisë së re, me të cilën ekipi do të shkojë edhe në përgatitje jashtë vendit./Zëri/
