Pep Guardiola e ka lavdëruar Barcelonën për një sezon që e quajti “pothuajse perfekt” dhe shprehu shpresën që kjo ecuri e suksesshme të vazhdojë edhe për shumë vite.
Ai ndau vlerësimin e tij edhe për talentin e ri Lamine Yamal, duke thënë se është i lumtur që ai po rritet në ambientin e duhur në “Camp Nou”.
“Lamine është një lojtar që i ndryshon ndeshjet nga krahu. Do të shohim nëse mund të krahasohet me më të mirët”, deklaroi Guardiola.
Ai përmendi performancën e Yamal kundër Interit si provë të pjekurisë së tij, ndërsa u ndal edhe te vazhdimi i kontratës dhe vendimi i tij për të qëndruar te Barcelona.
“I dhanë topin për të vendosur ndeshjen. Jam i befasuar që në moshën 17 vjeç bën gjëra të tilla”.
Guardiola u ndal edhe te kontrata e gjatë e adoleshentit, e vlefshme deri në vitin 2031, duke bërë një koment me humor: “Ai do të jetë në gjendje të blejë një shtëpi të mirë”.
“Nëse klubet e paguajnë, kjo është sepse ai i gjeneron këto para. Vendi më i mirë ku mund të jetë Lamine është te Barça. Si tifoz i këtij klubi, jam shumë i lumtur me vitin që kanë kaluar dhe që ky djalosh mund të qëndrojë aty për shumë vite”, deklaroi Guardiola. /Telegrafi/
