Harry Kane theu një rekord të mbajtur nga Cristiano Ronaldo dhe Erling Haaland duke shënuar dy herë për Bayern Munich të premten në mbrëmje.
Kapiteni i Anglisë shënoi dy gola në fitoren bindëse 4-0 të Bayern kundër Werder Bremen në Bundesligë.
Mbrojtësi Jonathan Tah hapi serinë e golave në minutën e 22-të, përpara se Kane të shënonte nga penalltia në minutën e 45-të dhe më pas të dyfishonte sërish në minutën e 55-të në “Allianz Arena”. Konrad Laimer vulosi rezultatin 4-0 në minutën e 87-të.
Para këtij suksesi, java nuk kishte qenë fort e kënaqshme për sulmuesin anglez, pasi ai u rendit vetëm i 13-ti në garën për Topin e Artë 2025, trofe që shkoi për Ousmane Dembélé të Paris Saint-Germain. Shumë tifozë u habitën që Kane nuk u fut as në top 10, megjithëse ai regjistroi 53 kontribute (gola + asistime) gjatë sezonit 2024/25, duke ndihmuar Bayernin të fitonte Bundesligën.
Një tifoz shkroi: “Harry Kane është me të vërtetë futbollisti më i nënvlerësuar i të gjitha kohërave. Nuk është as debat. Si ka mundësi që dymbëdhjetë lojtarë të kenë pasur një vit më të mirë se ai? E pamundur.”
Një tjetër shtoi: “Harry Kane jashtë top 10 të botës sipas disa çmimeve… janë thjesht subjektive, por gjithsesi më nervozon si gjithmonë e nënvlerësojnë Bayernin. Harry Kane duhet të ishte me lehtësi në top 10, turp i madh.”
Megjithatë, e premtja e tij rezultoi shumë më e këndshme se e hëna. Përveç dy golave dhe ndihmës për ta çuar Bayernin edhe më lart në krye të tabelës, ai arriti një rekord të jashtëzakonshëm:
Kane u bë lojtari më i shpejtë që ka arritur 100 gola për një klub në ligat top 5 të Europës.
Ai e realizoi këtë në ndeshjen e tij të 104-t, duke thyer rekordin e mëparshëm prej 105 ndeshjesh, të mbajtur nga Ronaldo në kohën e tij te Real Madrid dhe nga Haaland me Manchester City.
Ish-sulmuesi i Tottenham e ka nisur sezonin 2025/26 në formë të shkëlqyer, me 13 gola dhe 3 asistime në vetëm 7 paraqitje në të gjitha garat./GazetaExpress/
