Kryeministri i Kosovës, Ramush Haradinaj ka bërë të ditur se ka biseduar me homologun e tij maqedonas, Zoran Zaev për të nisur kërkimet për dy policët e zhdukur në Lepenc.
Haradinaj thotë se kërkimet në Maqedoni nuk mund të fillojnë pa përfunduar ato në Kosovë, raporton KTV.
“Kemi bërë një bisedë me kryeministrin Zaev, por s’mund të fillojmë procedurën andej derisa të mbyllet kjo në Kosovë. Është bërë një ekspertizë e Policisë së Kosovës, por që ende nuk është e gatshme”, ka thënë Haradinaj.
Sipas tij trupat e dy policëve kanë mundur të dalin edhe jashtë Kosovës për shkak të rrjedhës së rrëmbyeshme të lumit.
“Trupat e dy policëve ka mundur uji t’i qetë edhe jashtë Kosovës, pasi është shumë i rrëmbyeshëm. Kërkimet për trupat e tyre po vazhdojnë”, është shprehur ai.
Të shtunën mbrëma dy policë, Malsor Dashi dhe Armend Trena, raportohet se janë aksidentuar me veturën e Policisë në magjistralen Kaçanik-Han i Elezit te vendi i quajtur “Kulla e Qeshmes” dhe që nga ajo natë rezultojnë të zhdukur.
