Lewis Hamilton ka pranuar hapur zhgënjimin e tij, duke e cilësuar veten “thjesht të padobishëm”, pasi përfundoi i 12-ti në kualifikimet për Çmimin e Madh të Hungarisë, ndërsa shoku i tij i skuadrës te Ferrari, Charles Leclerc, befasoi duke siguruar pole position-in e parë të vitit për Ferrarin.
Hamilton nuk arriti të kalojë në sesionin e tretë të kualifikimeve, pasi gjatë gjithë fundjavës nuk gjeti ritmin e Leclerc. Ndërsa britaniku i zhgënjyer deklaroi shkurt: “ Jam thjesht i padobishëm. Kjo nuk ka të bëjë fare me makinën.”
Në pjesën e dytë të kualifikimeve, Hamilton u eliminua me një kohë 0.247 sekonda më të ngadaltë se Leclerc, i cili u rendit i gjashti më i shpejtë në atë fazë. Ky rezultat e çon bilancin e brendshëm në kualifikime mes dyshes Ferrari këtë sezon në 12-5 në favor të Leclerc, me një diferencë mesatare prej 0.146 sekondash për xhiro.
Forma e dobët e Hamilton të shtunave në vitin 2025 po vazhdon vështirësitë që ai pati sezonin e fundit me Mercedes, kur u mund vazhdimisht në kualifikime nga George Russell. Megjithatë, rezultati në Hungari bie ndesh me ecurinë e garave të fundit, ku Hamilton kishte arritur të qëndronte më afër Leclerc, përjashtuar një performancë të dobët javën e kaluar në Belgjikë, ku u eliminua që në sesionin e parë si në sprint ashtu edhe në garën kryesore pas disa gabimeve.
Pavarësisht zhgënjimit personal, Hamilton nuk ngurroi të përgëzojë Leclerc: “Është fantastike për ekipin që makina ka potencial për pole. Urime të mëdha për Charles.”
