Gjini shpërthen ndaj Kurtit: Unë isha nënkryetar i Ramush Haradinajt, kurse Albini ishte nënkryetar i Nenad Rikalos në KAN
Në një konferencë të jashtëzakonshme për media, Kryetari i Aleancës, Ardian Gjini, ka lëshuar akuza të rënda dhe të drejtpërdrejta në drejtim të kryeministrit në detyrë Albin Kurti.
Gjini ka bërë një krahasim të fortë lidhur me të kaluarën politike të tij dhe të Kurtit, duke rikthyer në vëmendje periudhën e funksionimit të organizatës KAN.
“Unë kam qenë nënkryetar i Ramush Haradinajt, po Albin Kurti ka qenë nënkryetar i Nenad Rikalos në KAN!”, ka deklaruar Ardian Gjini para gazetarëve.
Kjo deklaratë vjen si një goditje direkte ndaj Kurtit, në një kohë kur opozita po e akuzon kreun e LVV-së për bllokim dhe uzurpim të institucioneve pas zhvillimeve të fundit në Kuvend.
Sipas Gjinit, ndërsa vija e tij politike ka qenë gjithmonë e rreshtuar krahas krahut të luftës dhe Haradinajt, Kurti ka një të kaluar bashkëpunimi që duhet t’i shpjegojë qytetarëve.
Lexo edheAksident mes veturës dhe motoçikletës në Gjilan, policia jep detaje për rastin
Ndërkohë, kryetari i Aleancës ka përsëritur refuzimin e çdo bashkëpunimi apo takimi prapaskenash me Albin Kurtin, duke e sfiduar atë vetëm në një debat të hapur publik televiziv ku mund t’i ballafaqojnë këto fakte para gjithë popullit.
Për të sqaruar kontekstin e kësaj akuze, Nenad Rikalo është një politikan serb i Kosovës, i cili më vonë u bë pjesë e Listës Serbe dhe shërbeu si Ministër i Bujqësisë nga ku u shkarkua pas dyshimeve dhe akuzave për keqpërdorime.
Rikalo ka qenë pjesë e shoqërisë civile në Kosovë pas luftës dhe ka deklaruar publikisht se në vitin 2003 ka bashkëthemeluar organizatën KAN së bashku me Albin Kurtin.
