Numri i përgjithshëm i zyrtarëve policorë të cilët kanë dhënë dorëheqje nga Policia e Kosovës (PK), deri më sot është 1 mijë e 120 zyrtarë, ndërsa vetëm në vitin e 2021 kanë lënë vendin e punës 38 zyrtarë, shkruan Gazeta Metro.
Përveç mjekëve në Kosovë që po lënë vendet e punës dhe po ikin jashtë shtetit, janë edhe zyrtarët policorë të cilët po japin dorëheqje nga pozitat e tyre në Polici.
Një gjë e tillë u paralajmërua ditë më parë edhe nga vet drejtori i Policisë së Kosovë, Samedin Mehmeti.
Ai ka thënë se numër i madh i zyrtarëve policorë po lënë punën.
“Fatkeqësisht kemi rënie të numrit të pjesëtarëve të rinj të Policisë së Kosovës. Po ashtu është e vërtetë se shumë pjesëtarë po e lënë punën në Policinë e Kosovës. Mbase është çështje sociale apo ekonomike, mbase duhet të kemi një ekspert që merret me këtë çështje”, ka deklaruar Mehmeti ditë më parë.
Ndërkaq nga Policia e Kosovës, në një përgjigje për Metron, bëhet e ditur se vetëm në vitin 2021, numri i zyrtarëve që kanë lënë vendin e punës, kalon mbi 30.
“38 zyrtarë e kanë lënë vendin e punës në vitin 2021”, thuhet në përgjigjen e Policisë për Metron.
Sipas Policisë, deri më tani mbi 1 mijë zyrtarë kanë dhënë dorëheqje nga PK.
“Numri i përgjithshëm i zyrtarëve policorë të cilët kanë dhënë dorëheqje nga PK-ja deri me sot është 1120 zyrtarë”, thuhet më tutje në përgjigjen e Policisë për Metron.
Konkursi i fundit për policë të rijnë është shpallur më 28 tetor deri në 26 nëntor të vitit 2021. Në këtë konkurs kanë aplikuar 11 mijë e 292 kandidatë.
Ndërsa, testin në pyetjet me shkrim e kanë kaluar vetëm një mijë kandidatë. /gazetametro.net
