Vetëvendosje ka vendosur që të mos jetë pjesë e zgjedhjeve të jashtëzakonshme në Drenas.
Kjo lëvizje ka thënë se nuk dëshiron të përfitojë politikisht “nga një vendim i padrejtë gjyqësor në rastin Drenica 2, ku u dënua ish-kryetari i kësaj komune Nexhat Demaku”.
“Pas konsultimeve që i kemi bërë me anëtarësinë dhe strukturat tona, kemi marrë vendim që të mos jemi pjesë e zgjedhjeve të jashtëzakonshme në Drenas, sepse nuk duam të përfitojmë politikisht nga një dënim i padrejtë gjyqësor. Ne nuk e mbështesim asnjë kandidat të subjekteve tjera, ngase mendojmë se asnjëri nga ta nuk mundën të bëjnë ndryshime pozitive. Zgjedhjet e jashtëzakonshme po mbahen për të përfunduar mandatin e kryetarit, që mund te jetë vetëm disa muajsh. Përveç kësaj, përbërja e Kuvendit Komunal, si organi më i lartë nuk do të ndryshoj. Për më tepër, buxheti për pjesën e mbetur të mandatit është miratuar dhe gjasat që të ndryshohet janë tepër të vogla”, ka thënë kryetari i VV-së për Drenas Shemsi Elezi, në një konferencë të mbajtur sot.
Zgjedhjet për kryetar të Drenasit do të mbahen më 4 dhjetor. Vendimi për zgjedhje vjen pas largimit të Demakut nga ky post, për shkak të konfirmimit të dënimit për tre vjet burgim./Koha.net/
