Bajrami: “Qerrja para kalit” kësaj radhe në energji – 538 milionë euro për importe

Deputetja e LDK-së, Hykmete Bajrami, ka kritikuar Qeverinë në detyrë lidhur me menaxhimin e sektorit të energjisë, duke e cilësuar si “qerrja para kalit” vendimin për kompensimin e Bordit të Korporatës së Ruajtjes së Energjisë.

Përmes një postimi në Facebook, Bajrami ka rikujtuar se më 13 mars 2024, Qeveria kishte themeluar Ndërmarrjen Publike “Korporata e Ruajtjes së Energjisë – KRE”, me qëllim të menaxhimit të kapaciteteve për ruajtjen e energjisë.

Sipas saj, që nga atëherë Kosova ka importuar mbi 538 milionë euro energji elektrike.

Ajo ka paraqitur edhe shifrat sipas periudhave: 142 milionë euro gjatë vitit 2024, 259 milionë euro gjatë vitit 2025 dhe 137 milionë euro gjatë periudhës janar-gusht 2026.

“Pra, ndërmarrja për ruajtjen e energjisë u themelua, por kapacitete për ruajtjen e energjisë ende nuk kemi. Ndërkohë, importi po vazhdon e qindra miliona euro po dalin jashtë vendit”, ka shkruar Bajrami.

Ajo ka kritikuar edhe vendimin e Qeverisë në detyrë për kompensimin mujor të anëtarëve të Bordit të kësaj ndërmarrjeje.

“E mbrëmë, në një mbledhje elektronike të mbajtur natën, Qeveria në detyrë e pa urgjente të marrë vendim për kompensimin mujor të anëtarëve të Bordit të kësaj ndërmarrjeje”, ka deklaruar ajo.

Bajrami ka ironizuar deklaratat e kryeministrit në detyrë, Albin Kurti, për “qerren para kalit”, duke thënë se e njëjta situatë, sipas saj, po përsëritet në sektorin e energjisë.