Angela Merkel është kategorike, duke hedhur poshtë skenarët e kandidaturës së saj të mundshme për postin e Presidentes Federale të Gjermanisë në vitin 2027.
“Kjo përjashtohet”, tha një zëdhënës i zyrës së saj për gazetën “Tagesspiegel”. Qëndrimi i ish-zëdhënësit të kancelares vjen pas lajmit të publikuar nga Bild se brenda Partisë Kristian Demokrate (CDU) kishte shqetësime se të Gjelbrit po planifikonin të propozonin Merkelin si një pasardhëse të mundshme të Frank-Ëalter Steinmeier, në zgjedhjet që do të mbahen në fillim të vitit 2027.
Thashethemet u nxitën më tej nga njoftimi se ish-kancelarja do të marrë pjesë në kongresin e ardhshëm të CDU-së më 20 shkurt në Stuttgart, për herë të parë që nga viti 2019, dhe ndërsa dihet se marrëdhënia e saj me kancelarin aktual dhe kreun e CDU-së Friedrich Merz është e tensionuar. Merz pritet gjithashtu të rizgjidhet si kryetare e partisë në kongres.
Zgjedhja e Presidentit të ri Federal duhet të përfundojë nga Asambleja Federale në shkurt 2027, duke pasur parasysh përfundimin e mandatit të dytë të Frank-Walter Steinmeier në fund të marsit. Z. Steinmeier nuk ka të drejtë për një kandidaturë të tretë për këtë post.
Siç thekson Tagesspiegel, privilegji i paraqitjes së propozimit të kandidatit të parë ndoshta do të pretendohet nga CDU, si grupi më i madh parlamentar, ndërsa do të ishte e pamundur që të Gjelbrit të paraqisnin një propozim konkurrues, veçanërisht në personin e Angela Merkel. Do të ishte gjithashtu hera e parë që një ish-kancelar kandidon për postin më të lartë shtetëror. Gazeta raporton gjithashtu se ka presion për të zgjedhur një kandidate femër, ku kandidatët më të mundshëm janë Presidentja e Bundestagut Julia Kloeckner, Ministrja Federale e Arsimit Karin Prien dhe Presidentja e Parlamentit të Shtetit të Bavarisë Ilse Aigner.
