AAK ka ‘dridhur’ me prononcimin e tyre të fundit publik, duke akuzuar se kompania turke ka fituar me dallavere tenderin për ndërtimin e Stadiumit Kombëtar.
Asociacioni i Arkitektëve të Kosovës (AAK) ka akuzuar Ministrinë e Kulturës, Rinisë dhe Sportit (MKRS), që nuk i është përmbajtur rregullave të duhura lidhur me tenderin për ndërtimin e stadiumit.
Sipas këtij asociacioni, MKRS-ja, i ka dhënë tender me dallavere kompanisë turke për ndërtimin e Stadiumit Kombëtar, shkruan lajmi.net.
Reagimi i plotë i AAK-së pa ndërhyrje:
Asociacioni i Arkitektëve të Kosovës (a-a-k), në mbledhjen e rregullt të datës 08.07.2019 shqyrtoi kërkesat e anëtarëve të saj të interesuar për informacion për procesin e konkursit të projektit të Stadiumit Kombëtar në Drenas, të shpallur dhe të përmbyllur disa ditë më parë në kuadër të procedurave të udhëhequra nga Ministria e Kulturës Rinisë dhe Sporteve të Kosovës.
Pasi që, Asociacioni i Arkitektëve të Kosovës, nuk ka qenë i përfshirë në asnjë mënyrë në procedurat e zhvilluara të përgatitjes së programit të konkursit, të evaluimit të tij apo dhënies së çfarëdo mendimi profesional, ndajmë shqetësimet me anëtarët tonë dhe opinionin, lidhur me jo-transparencën gjatë vendimmarrjes nga ana e Ministrisë së Kulturës Rinisë dhe Sportit (MKRS) dhe njëkohësisht, iu informojmë se, as në shkresën tonë zyrtare drejtuar Ministrit, dhe Ministrisë, ne, si trupi i vetëm profesional me interes publik në vend, nuk kemi marrë as edhe një përgjigje.
Në situatën e krijuar, e gjitha çka mund të ndajmë me anëtarësinë dhe opinionin është:
– Procedura e aplikuar e përzgjedhjes së konkurentëve, ka qenë procedure e kufizuar;
– Konkursi ka përfunduar me rivlerësim, për arsye të ankesës së konsorciumit amerikam DLP – ARUP ,të cilët fillimisht janë eliminuar, sipas arsyetimit “për mungesë të eksperiencës…”, ndërkohë që të dy antarët e konsorciumit janë top kompani botërore;
– Në këtë rast, Organi Shqyrtues i Prokurimit ka kthyer procedurën mbrapsht;
– Nga të gjithë të paraqiturit në konkurs dhe gjashtë të përzgjedhurit, vetëm dy punime janë dorëzuar [Konzorciumi amerikan DLP – ARUP njëherë i eliminuar si dhe kompania Turke Tabanlioglu, tashmë fituese];
– Konsorciumi amerikan e ka tërheqë punimin e vet para se të kalojë procedurën e vlerësimit, pasi që MKRS-ja nuk ka emëruar komisionin vlerësues konform rregullave të konkurseve ndërkombëtare;
– Projekti i kompanisë turke [Tabanlioglu] është shpallë si më i miri në konkurrencë me vetveten, nga se ka qenë i vetmi në procedurën e vlerësimit;
– Nuk ka pas asnjë mbrojtje publike, prezantim publik apo çfarëdo forme të komunikimit me publikun as nga autoret as nga Komisioni eventual;
– Nuk ka pas as Komision Vlerësues profesional, të njohur apo të publikuar, ose i njëjti është mbajtur larg syve të publikut;
– Vetëm më 14.06.2019 është mbajtur, një prezantim përpara një rrethi të ngushtë të emrave nga politika dhe sporti;
– Asociacioni nuk komenton projektin arkitektonik, pasi që, nuk ka pas casje në vlerësimin e tij.
Njëkohësish, njoftojmë se nuk jemi të thirrur, në çfarëdo cilësie, nga ana e MKRS as për Konkursin tjetër kapital të paraparë, atë për ndërtesën e Teatrit dhe Operës. Në ndërkohë, ne jemi informuar se me datë 08.07.2019 Ministria (MKRS) ka anuluar procedurat e mëtejme për këtë Konkurs dhe më pas me një lajmërim të ri ritenderohet, edhe pse një lajmërim i tillë sot, nuk mund të shkarkohet nga ëeb-faqja zyrtare e MKRS-së.
Gjithsesi, ekipi ynë monitories, do të tentoj në vazhdimësi të kontaktoj dhe të grumbulloj informata nga Ministria (MKRS) për këtë çështje dhe për të njëjtat do të iu mbaj të informuar me kohë.
Me respekt,
Kryesia e Asociacionit të Arkitektëve të Kosovës. /Lajmi.net/
