Janë dhjetëra persona që jetojnë me hemofili, një sëmundje e rrallë e gjakut që kërkon trajtim të vazhdueshëm dhe kujdes të specializuar.
Çështje të rëndësishme që lidhen me trajtimin, diagnostikimin dhe kërkesat e pacientëve ishin në fokus të diskutimit mes ekspertëve të fushës, ku u theksua domosdoshmëria e krijimit të një qendre të posaçme për trajtimin e kësaj sëmundjeje.
“Ajo që është sfiduese për ne profesionistët, por edhe për pacientët, është nevoja për krijimin e një qendre për hemofili. Duhet të kemi një qasje multidisiplinare, me përfshirjen e ortopedit, fizioterapeutit dhe hematologut specialist”, tha Afërdita Ukimeraj- drejtoreshë e Klinikës së Hematologjisë.
Diagnostikimi i hershëm është një sfidë tjetër e rëndësishme që, sipas mjekëve të specializuar, kërkon më shumë ndërgjegjësim.
“Diagnostikimi i hershëm është shumë i rëndësishëm. Zakonisht, rreth 3/4 e pacientëve me çrregullime të gjakderdhjes zbulohen pas ndonjë ndërhyrjeje kirurgjikale, pas një injeksioni intramuskular apo edhe pas një vaksinimi të thjeshtë, i cili mund të zbulojë se ekziston një çrregullim i gjakderdhjes”, tha Fetije Daciq, transfuziologe.
Nol Hoxha është një nga personat që jeton me hemofili, ndërsa kushtet për trajtim, sipas tij, kanë filluar të përmirësohen.
“Kushtet kanë nisur të jenë më të mira se në vitet e mëhershme. Nëse bëjmë një krahasim me 28 vjet më parë, prej kur jam me hemofili, sot ato janë shumë më të mira”, tha Hoxha.
Pacientët me hemofili në vendin tonë marrin trajtim në Klinikën e Hematologjisë, ndërsa fëmijët trajtohen në repartet e pediatrisë.
