Komisioni Qendror i Zgjedhjeve, ka filluar të publikoj të dhënat nga numërimi i votave për kandidatët për deputetë.
Deri tani janë numëruar vetëm 0,90% të kutive të votimit, shkruan lajmi.net.
Siç ka publikuar KQZ, numërimi i votave ka filluar nga vendvotimet në Dragash, Shtërpcë, Viti, Han i Elezit dhe Graçanicë.
E bazuar në këto vota të numëruara, nga VV menjëherë pas Albin Kurtit e Glauk Konjufcës ka dal Arsim Ademi me 1 mijë e 97 vota deri më tani.
Kush është Arsim Ademi?
Arsim Ademi është i lindur më 24 maj 1979 në fshatin Vërban të Komunës së Vitisë, ka përfunduar studimet themelore dhe master në Fakultetin e Mjekësisë Veterinare pranë Universitetit Bujqësor të Tiranës.
Studimet e doktoraturës i ka kryer në Universitetin Norvegjez të Shkencave të Jetës, në fushën e Shkencave të Tokës dhe Agronomisë.
Në fushën profesionale, Arsim Ademi ka dhënë kontribut të rëndësishëm në sektorin e veterinarisë, duke punuar si mjek veteriner dhe ligjërues në Fakultetin e Bujqësisë dhe Veterinarisë pranë Universitetit të Prishtinës.
Ai ka mbajtur pozitat e nënkryetarit dhe kryetarit të Odës së Veterinerëve të Kosovës dhe ne Qeverinë Kurti II ka qenë zëvendësministër në Ministrinë e Arsimit, Shkencës, Teknologjisë dhe Inovacionit.
Angazhimin politik e nisi në vitin 2018, kur iu bashkua Lëvizjes VETËVENDOSJE!, dhe aktualisht është kryetar i Qendrës së LVV-së në Viti dhe anëtar i Këshillit të Përgjithshëm të Lëvizjes. Në zgjedhjet komunale të vitit 2021, ai kandidoi për kryetar të Komunës së Vitisë nga radhët e LVV-së.
Arsim Ademi ka garuar në këto zgjedhje në listën e VV-së për deputetë me numrin 31. /Lajmi.net/
