Në ambientet e ShFMU “Halil Bajraktari” në Drenas është mbajtur një koncert përkujtimor, organizuar nga mësimdhënësi Hajzer Gjoshi, në nderim të 1432 fëmijëve të vrarë gjatë luftës çlirimtare në Kosovë.
Ky aktivitet, që u përcoll me emocione të forta, u vlerësua si një mesazh i fuqishëm për ruajtjen e kujtesës historike dhe për sakrificën e madhe që u bë për lirinë dhe shtetin që kemi sot.
“Nuk do ta harrojmë kurrë se si erdhi liria. Ky koncert është dëshmi dhe kujtesë për brezat që vijnë, se kush e harron historinë, është i dënuar ta përsërisë atë,” theksoi kryetari i Komunës së Drenasit, Ramiz Lladrovci.
Ai përgëzoi drejtuesit e shkollës, prindërit dhe nxënësit që realizuan një koncert mbresëlënës, si dhe falënderoi profesor Hajzer Gjoshin për përkushtimin dhe angazhimin e tij të veçantë me nxënësit para një publiku të gjerë.
“Lavdi e nderim për dëshmorët dhe martirët e kombit! Nderim i përjetshëm për 1432 fëmijët e vrarë gjatë luftës!” – përfundoi Lladrovci.
