Klubi Futbollistik “Feronikeli” ka konfirmuar largimin e Afrim Tovërlanit nga stoli, teksa është vënë menjëherë në kërkim të një emri që do ta zëvendësojë “Tokin”.
Drejtuesit e klubit tashmë janë vënë në kontakt me disa trajnerë brenda dhe jashtë vendit, duke patur kështu jo pak opsione pranë vetës në tryezë.
Gazeta “Sheshi” merr vesh që tre kandidatët e mundshëm për të marrë drejtimin e skuadrës janë Blendi Shkëmbi, Qatip Osmani dhe Bekim Isufi, ky i fundit kishte qenë më herët pjesë e klubit si drejtor sportiv dhe e njeh mjaft mirë ambientin në “Rexhep Rexhepi”.
Shkëmbi opsioni i parë
Ish-futbollisti korçar i cili prej dy vitesh po ushtron detyrën e trajnerit është njëri ndër emrat më të kërkuar në tregun shqiptar të futbollit. Së fundmi 41 vjeçari drejtoi skuadrën e Teutës nga Durrësi në 60 ndeshje zyrtare, teksa pati rezultate të kënaqshme.
Shkëmbi e njeh mirë mentalitetin e futbollit kosovar, pasi që tri edicione më parë kishte drejtuar Lirinë e Prizrenit, skuadër më të cilën pati jo pak rezultate.
Formacioni tij i preferuar është 4-3-3.
Isufi opsioni më i përshtatshëm
Strategu gjilanas është gjithashtu njëri nga opsionet e mundshme për të marrë drejtimin e skuadrës nga Drenasi. Isufi vite më parë ishte drejtor sportiv në këtë skuadër dhe e njeh mjaft mirë ambientin në dhomat e zhveshjes në “Rexhep Rexhepi”, megjithëse skuadra ka ndryshuar jo pak nga ajo kohë. Nga ajo kohë Isufi fitoi titullin e kampionit me Dritën dhe Superkupën e Kosovës, si dhe shkroi historinë me ‘bardhekaltërit’ në arenën ndërkombëtare duke arritur ta kalonte rundin parakualifikues në Ligën e Kampionëve.
Formacioni i preferuar i Isufit është 4-2-3-1, një modul i lojës, i cili i përshtatet mjat mirë organikës së “Niklit”.
44 vjeçari së fundmi drejtoi skuadrën e Ferizajt.
Osmani një tjetër opsion i favorshëm
Qatip Osmani është një opsion tjetër për stolin e “Niklit”. Tekniku 51 vjeçar ndodhet pa punë që nga 2 marsi i këtij viti edhe kur ndërpreu bashkëpunimin me Shkupin.
Ai në të kaluarën ka drejtuar Renovën dhe Shkëndinë e Tetovës, skuadër me të cilën fitoi edhe dy tituj kampion si shef i shtabit teknik në kampionatin maqedonas.
Osmani luan me sistemin 4-2-3-1 gjithashtu.
Drejtuesit e Feronikelit planifikojnë që gjatë pushimit disa ditor në mungesë të ndeshjeve kampionale të zgjidhin çështjen e trajnerit, ndërkohë në “lojë” mund të futen edhe opsione të tjera.
