Mbrëmë një rojë pylli N.RR. dyshohet se është vrarë me armë zjarri, në afërsi të Badovcit.
Rasti sipas zëdhënësit të Policisë së Kosovës, Daut Hoxha, ka ndodhur në rrugën Graçanicë – Gjilan.
“Mund t’ju konfirmoj se më 18.12.2019, rreth orës 21:50, në një distancë nga rruga Graqanicë- Gjilan, në pyll është gjetur një person vdekja e të cilit eshte konfirmuar nga ekipi i ambulancës”, ka thënë Hoxha.
Derisa Laureta Ulaj, Zyrtare për Informim dhe Monitorim të Mediave, nga Prokuria Themelore në Prishtinës, ka dhënë edhe detaje në lidhje me rastin, i cili është cilësuar si “Vrasje e rëndë”.
“Në trupin e të ndjerit janë gjetur plagë, të cilat dyshohen të jenë shkaktuar nga arma e zjarrit. Me urdhër të prokurorit kujdestar, trupi do të dërgohet për obduksion, në Institutin e Mjekësisë Ligjore. Rasti po hetohet si “Vrasje e rëndë””, ka thënë Ulaj për Indeksonline.
Ajo tutje ka shtuar se aktualisht, nuk ka të dyshuar të përfshirë në këtë rast.
Kujtojmë që Policia e Kosovës, për Indeksonline ka bërë të ditur edhe numrin e personave zyrtar që janë sulmuar deri në fund të muajit të kaluar.
Sipas policisë, 96 sulme janë kryer ndaj personave zyrtarë, ndërsa 36 janë sulmuar derisa ata po kryenin detyrat e tyre.
Që në total, deri në fund të muajit nëntor, numri i personave zyrtarë të sulmuar është 132./Indeksonline
