Presidenti i vendit, Hashim Thaçi ka vendosur datën 26 dhjetor si date kur do të mbahet seanca konstituive.
Por dy subjektet politike LVV dhe LDK akoma nuk janë dakorduar për arritjen e një marrëveshjeje për bashkëqeverisje duke shkaktuar një bllokadë në formimin e institucioneve.
E njohësi i çështjeve politike Nexhmedin Spahiu, në një prononcim për “Gazeta Blic” ka treguar “lojërat” dhe taktikat që mund të jenë duke u kalkuar mes këtyre dy partive për ndarjen e pushtetit.
“Besoj që do të arrihet marrëveshja dhe do të gjendet kompromisi. Ndërsa sa i përket postit të Presidentit është e vështirë që të gjendet një figure përbashkuese mes LDK-së dhe VV-së , nuk ka figura të tilla. LDK-ja do të kishte dëshirë ta kishte presidentin në mënyrë që ajo ta kishte peshën me të madhe në koalicionin qeverisës, sepse ajo duke marrë Presidentin , kryeparlamentarin dhe gjysmën e qeverisë atëherë pesha do të rëndonte nga ana e LDK-së. Ndërsa Albin Kurti dëshiron një president “kukull” si Atifete Jahjaga,që të jetë vetë edhe President edhe Kryeministër. Mund të ndodhë që LDK t’i japë Ministrinë e Punëve të Brendshme Vetëvendosjes dhe Vetëvendosja të lëshojë pe për Presidentin. LDK-ja ka kërkuar ministrinë e Punëve të Brendshme dhe jo të Jashtme për të ‘eleminuar’ Vjosa Osmanin ” tha Spahiu për Gazeta Blic.
Edhe gjatë ditës së djeshme Albin Kurti dhe Isa Mustafa nuk arritën të finalizojnë marrëveshjen për bashkëqeverisje.
Nga VV, zëdhënësi për media i kësaj partie deklaroi për “Gazeta Blic” se gjatë ditës së sotme nuk është paraparë ndonjë takim mes këtyre dy subjekte raporton Gazeta Blic.
