Arbëresha Kryeziu Hyseni, asambliste e Lëvizjes Vetëvendosje në Komunën e Gjilanit, ka demantuar, sekretarin e Partisë Socialdemokrate (PSD), Dardan Molliqajn për njoftimin e tij se Xhelal Hajrullahu nga radhët e VV-së ka aderuar sot në PSD.
Kryeziu-Hyseni, ka thënë se aderimi i Hajrullahut në PSD ka ndodhur para 5 muajsh. Ajo ka thënë se sponzorizimi i lajmeve është bërë sot pasi që siç thotë Arbëresha Kryeziu-Hyseni, ish-bashkëpartiku i tij nuk e kishte përballuar të ashtuquajturën “mosnënshtrimin”.
“Sponzorizimi i lajmit paska ndodhë sot, njejtë siç pati ndodhur ditën kur ky ish-asambleist i Lëvizjes u largua, sepse nuk e përballoi të ashtuquajturën MOSNËNSHTRIM. Kjo ka ndodhur më 11 prill, që i bie 5 muaj më parë. Mënyra e dorëheqjes në rrjete sociale dhe arsyet “copy-paste” të njejta me të trëndafilave të Kaqushes, ka lënë të kuptojmë qysh në fillim cilit subjekt i është bashkuar”, ka shkruar Kryeziu-Hyseni në llogarinë e saj në Facebook.
Tutje, asamblistja e VV-së në Gjilan ka thënë se “nuk mund të thuhet aderim i ri, sepse qysh nga prilli është trëndafilizu. E dijmë që po ia këpusin petalet aderimet e reja të ditë për ditshme në Lëvizje, që po vijnë pa as më të voglin interes. Bile disa edhe po i largojnë nga puna në momentin që po dalin publikisht që janë VETËVENDOSJE!”.
Ndër tjera ajo ka akuzuar PSD-në se ata që janë duke u deklaruar si anëtar të PSD-së po e bëjnë pasi po iu punësohen të afërmit e tyre.
“Ndërsa ata që deklarohen si ?, vijnë pasi t’ia keni rahatu me ndonjë vend pune grujën, motrën, vëllaun, djalin e tezes a axhës…e kështu me radhë!”, ka shkruar Arbëresha Kryeziu Hyseni.
Ndërsa sot, Dardan Molliqaj përmes një postimi në llogarinë e tij në Facebook, ka postuar një foto së bashku me Xhelal Hajrullahu, me mbishkrimin se janë ribashkuar për t’i realizuar përpjekjet e tyre për Kosovën.
“Xhelal Hajrullahu, asambleisti më i votuar i VV-së në Gjilan, sot u bashkua me ne. Ishim bashkë në përpjekjet tona për një Kosovë më të mirë. Jemi ribashkuar për t’i REALIZUAR ato përpjekje.”, ka shkruar Molliqaj.
