Tronditja dhe trishtimi kanë pushtuar familjen e varfër të Altin Lushkës në Fier, pasi tre të rinj rrëmbyen dhe tentuan të abuzojnë me vajzën 13 vjeçe, nxënëse e klasës së shtatë.
Familjarët kanë ndërhyrë në kohë duke arritur të shpëtojnë të bijën, e cila ndodhej në gjendje shoku dhe në pamundësi për të shpjeguar se çfarë kishte ndodhur. Menjëherë është sinjalizuar policia, e cila ndërhyri në kohë dhe arriti të arrestonte tre të rinjtë e dyshuar për veprën penale “Heqje e paligjshme e lirisë” dhe “Marrëdhënie seksuale me të mitur”, e mbetur në tentativë. Sipas panorama, vajza është marrë në pyetje në prani të një psikologu, por siç konfirmohet ajo është e tronditur nga ngjarja dhe nuk ka qenë në gjendje të japë detaje.
Babai i saj, Atin Lushka, që arriti ta shpëtojë vajzën në kohë, tregon momentin më të tmerrshëm që kaloi në jetën e tij: “Çupa shkonte çdo natë tek im vëlla për të parë televizor. Iku nga ora 20:00, më thanë gratë në shtëpi. Më vonë mora vesh që nuk ishte akoma në dhomë. I kishin shtruar batanijen, i kishin bërë vendin atje ata (autorët). Vajzën e gjetëm të lidhur, do ta përdhunonin, për atë e kishin marrë ata. Kur iu afrova unë, ata ikën me vrap nga dritarja, ishin tre veta. Janë nga fshati Arapaj këtu. Vajza ishte e lidhur nga duart edhe goja. I kishin futur një leckë në gojë”, u shpreh babai i saj, Altin Lushka. /syri/
