Chelsea është kualifikuar në raundin e katërt të Kupës FA pasi eliminoi Norwich Cityn pas ekzekutimit të penalltive.
Ndeshja e parë që u zhvillua në Norwich përfundoi pa gola, ashtu që takimi u përsërit në Stamford Bridge për të përcaktuar fituesin.
(Foto: Getty Images)
Gjysma e parë nuk prodhoi gola, mirëpo nuk munguan rastet. Një mundësi shumë të mirë në këtë pjesëlojë e pati Daniel Drinkwater për Blutë, ndërsa nga ana tjetër Nelson Oliveira e goditi transversalen.
Rezultati u zhbllokua në pjesën e dytë të takimit, ndërsa realizues ishte sulmuesi belg, Michy Batshuayi. Kenedy dhuroi një harkim i ulët nga ana e majtë në zonë, ku e priti 24-vjeçari për ta futur topin në rrjetë (55′).
(Foto: Getty Images)
Në vazhdim, Norwichi i pati dy raste përmes James Maddison, i cili fillimisht e goditi shtyllën, ndërsa në goditjen e dytë intervenoi portieri Wilfredo Caballero.
Ndërsa kur pritej që Chelsea ta siguronte kualifikimin, skuadra që bën gara në Championship e barazoi rezultatin. Timm Klose dërgoi një harkim fantastik në zonë, ndërsa Jamal Lewis shënoi me kokë (90′ +4).
(Foto: Getty Images)
Dhe meqë rezultati ishte i barabartë dhe ishin zhvilluar dy lojë, ndeshja shkoi në vazhdime për ta vendosur fituesin.
Në pjesën e dytë të vazhdimeve, Pedro u përjashtua me kartonin e dytë të verdhë (117′), ndërsa pas tij u përjashtua edhe Alvaro Morata për shkak të sjelljes së tij (120’+1).
(Foto: Getty Images)
Sidoqoftë, edhe vazhdimet u mbyllën pa fitues, ashtu që skuadrën që vazhdoi në raundin e tretë e vendosën penalltitë.
Më të saktë në ekzekutimin e njëmbëdhjetëmetërshave ishin futbollistët e Chelseat që në fazën tjetër do të luajnë kundër Newcastle Unitedit. /Telegrafi/
