Ministri në detyrë i Mbrojtjes i Republikës së Kosovës, Ejup Maqedonci, dhe ministri i Mbrojtjes Kombëtare i Republikës së Turqisë, Yaşar Güler, nënshkruan marrëveshjen e bashkëpunimit financiar ushtarak ndërmjet dy shteteve.
Marrëveshja parasheh mbështetje financiare me qëllim fuqizimin e kapaciteteve dhe avancimin mëtejmë profesional të Forcës së Sigurisë së Kosovës.
“Në këtë kuadër, Qeveria e Republikës së Turqisë do të mbështesë Qeverinë e Republikës së Kosovës me 200,000,000.00 TL (dyqind milionë lira turke), me qëllim fuqizimin e kapaciteteve të Forcës së Sigurisë së Kosovës dhe avancimin e mëtejshëm të saj institucional e profesional” shkroi Maqedonci.
Ai thotë se marrëveshja përfaqëson një dëshmi të qartë të partneritetit strategjik dhe të gatishmërisë së përbashkët për ta forcuar më tej bashkëpunimin në mënyrë konkrete dhe afatgjate.
