Në selinë e PDK-së në Drenas janë mbledhur shumë simpatizantë të cilët po presin rezultatet e zgjedhjeve të jashtëzakonshme në këtë komunë.
Zëdhënësi i shtabit të PDK-së në Drenas, Betim Berisha në një lidhje direkte në Klan Kosova ka thënë se në PDK mbizotëron një frymë pozitive për fitore.
“Dita e sotme ishte e mirë, me diell, falënderoj qytetarët që kanë treguar pjekuri. Procesi ka përfunduar pa asnjë incident, duke mos lënë anash incidentet e vogla që kanë qenë të lokalizuara”.
Ai ka thënë se rezultatet e para që vijnë nga terreni tregojnë për një rezultat të fitores së bindshme të kandidatit të PDK-së, Ramiz Lladrovci.
“Simpatizantët e PDK-së janë më të devotshmit në Drenas, në orën 21:00 do të dalin rezultatet për fitoren tonë. Lladrovci është në seli duke pritur, dhe është shumë i relaksuar”.
“Unë besoj se ashtu si kanë festuar herët tjera, do të festojnë edhe sot simpatizantët e PDK-së”.
