Plagët e luftës ende jetojnë të gjalla të banorët e fshatit Abri e Epërme. Data e sotme sjell pikëllim dhe përkujtim jo vetëm te ata që e përjetuan këtë masakër, mirëpo, te të gjithë banorët e kësaj ane dhe më gjerë.
Më datën 25 shtator familja Deliu ishte larguar nga vendbanimet për t’u strehuar në mal, për t’i shpëtuar sulmeve serbe.
Një ditë më vonë më 26 shtator, këmbësoria serbe arrin te të strehuarit në mal, e cila kreu njërën ndër masakrat më të tmerrshme në Kosovë.
23 anëtarët e familjes Deliu, gra, fëmijë e pleq, nga mosha gjashtë e deri në moshën 94 vjeçare u masakruan. Të gjithë ishin ekzekutuar nga afërsia me nga një plumb në kokë dhe më pas ishin masakruar.
Pamjet e të masakruarve të cilat u transmetuan në medie botërore, treguan qartë se në Kosovë po kryhej gjenocid nga Serbia. /Drenica Press/
