Polica e Lezhës ka bërë të mundur arrestimin e një shtetasi të shpallur në kërkim për mashtrimin e 8 personave për kontrata pune jashtë shtetit kundrejt një pagese monetare.
“Më datën 08.08.2016, në bazë të informacioneve të siguruara në rrugë operative, nga Sektori Kundër Krimit Ekonomiko-Financiar në Drejtorinë Vendore të Policisë Lezhë, u ndalua shtetasi në kërkim Kol Gjokaj, 43 vjeç, banues në Gjakovë, Kosovë.
Ky shtetas dyshohet se në muajin maj 2015 , në Lezhë, ka mashtruar 8 shtetas duke ju premtuar kontrata pune në Austri kundrejt një pagese prej 800 euro secilit”, sqaron policia.
Për këtë shtetas, sipas Shqip, Gjykata e Shkallës se Parë Lezhë me datë 05.02.2016 ka caktuar masën e sigurimit “Arrest me burg” për kryerjen e veprës penale të “Mashtrimit” parashikuar nga neni 143 i Kodit Penal.
Materialet procedurale u referuan Prokurorisë së Rrethit Gjyqësor Lezhë për veprime të mëtejshme.
