Rreth orës 22:00 të mbrëmjes së të martës mbi 20 zyrtarë të Policisë së Kosovës rrethuan shtëpinë e 75 vjeçarit, Mehmet Gjyrevcit. Plaku nga Fushë Kosova kishte arritur t’i fshihte 6 armë nën shtratin ku flinte. Për armët nuk kishte qenë aspak në dijeni familja e 75-vjeçarit. Policia e arrestoi atë mbrëmë dhe për momentin gjendet në paraburgim.
Gjashtë revole të ndryshme e 150 fishekë të llojeve dhe kalibrave të ndryshëm kishin disa kohë që qëndronin të palosura nën krevatin ku flinte 75 vjeçari nga komuna e Fushë Kosovës, Mehmet Gjyrevci. Por, kishin qenë pikërisht këto armë ato që e dërguan atë në qendrën paraburgimit.
Ai i mbante armët pa leje në shtëpinë e tij. Ato u zbuluan mbrëmë nga policia e Kosovës. Rreth orës 21:30, mbi 20 pjesëtarë të policisë së Kosovës ia rrethuan shtëpinë plakut nga Fushë Kosova. Por, edhe vetë policia u habit nga ajo se çka gjeti në shtëpinë e të moshuarit.
E se kishin armë në shtëpi nuk e dinte askush përpos plakut. Së paku kështu thonë familja Gjyrevci e cila mbeti e habitur nga ajo se çka u gjeti policia.
Gazeta Express, të mërkurën ka qëndruar në shtëpinë e 75-vjeçarit. Familjarët kanë rrëfyer rreth ngjarjes. Djali i tij thotë se nuk ka ditur gjë për armët të cilat i posedonte Mehmeti.
“Ku i ka marrë babai ato armë nuk e di. Ato i ka pas nën krevat në dhomën e tij të fjetjes. Ne po ndihemi shumë keq. Ai në atë moshë me shku me qëndrua në burg. Kur policia ka ardh me bastisë shtëpinë time policët e kam kërkua fletarrestin, dhe u kam thënë shkoni në shtëpi e kontrollone. Unë kam qenë i bindun që në shtëpi nuk ka asgjë. U kam thanë tek unë nuk ka asgjë të keqe. Familja, hiç asnjëri nuk e ka ditë që ai mbanë armë”, thotë djali i tij.
Djali i të dyshuarit, Bekimi, thotë se është hatëruar me prindin e tij.
“Hatri më ka mbete që s’ka tregu. Por në shtëpi e pranojmë. Armët në shtëpi nuk ia kisha lënë. Nuk kanë se çfarë na vyejnë. Unë dje bashkë me babë ishim në treg, nuk më tha asgjë për asnjë armë”, thotë djali i 75 vjeçarit të arrestuar. Por familja po shqetësohen për shëndetin e tij. Djali i tij, Bekimi, thotë se prindi i tij është i sëmurë nga zemra.
“Po më dhimbset se i moshuar me shku në burg. Ai është i sëmurë nga zemra. Ne po themi se asnjëri nuk kemi ditur gjë për këtë punë”. 75 vjeçari i ka gjithsej 10 fëmijë, gjashtë vajza e katër djem.
Në aksionin e mbrëmshëm, policia i ka konfiskuar disa revole pas operacionit të bastisjes që organet e hetuesisë e kryen mbrëmë në shtëpinë e të dyshuarit.
Ppolicia ka konfirmuar për Express, se të moshuarit i janë sekuestruar 6 armë zjarri. Një Ecol Special 99 cal. 9mm, me dy karikatorë, një Crvena Zastava 9mm, me një karikator; një TT 7.62 mm, me një karikator; një CZ VZOR 50 Cal. 7.65 mm; një Pjetro Bereta cal. 7.65mm model 70; një Bloë Mini cal 8mm nr .serik 5-154231 me një karikator; si dhe 150 fishekë të llojeve dhe kalibrave të ndryshëm.
I moshuari ka pranuar për organet e hetuesisë se armët kanë qenë në pronësi të tijën. Për këtë rast organet e shtetit po i vazhdojnë hetimet. Ndaj 75 vjeçarit, Mehmet Gjyrevci, është iniciuar rasti, mbajtje në pronësi, kontroll ose posedim të paautorizuar të armëve./GazetaExpress/
