Pas aktgjykimit të Gjykatës Supreme, KQZ-ja është obliguar që ta nisë numërimin e 4600 votave të diasporës të cilat kanë ardhur me vonesë në Kosovë. Zëdhënësi i KQZ-s Valmir Elezi është shprehur se fillimisht këto vota do të verifikohen se a janë të vlefshme pastaj do të nisë procedura e numërimit, raporton “Zëri.info”
“Para fillimit të numërimit të fletëvotimeve në Qendrën e Numërimit dhe Rezultateve është e nevojshme që të bëhet shqyrtimi dhe vlerësimi i zarfeve të supozuara me fletëvotime. Vlerësimi ka për qëllim që ta dimë nëse fletëvotimi është dërguar nga një votues i regjistruar suksesshëm si votues jashtë vendit, apo është dërguar nga ndonjë person tjetër që nuk e plotëson këtë kriter të domosdoshëm”, ka thënë Elezi.
Elezi ëshë shprehur se do të duhen dy ditë që të verifikohen këto vota pastaj numërimi i tyre do të bëhet brenda një dite.
“Pasi të bëhet ky vlerësim, do ta dimë saktë se sa është numri i fletëvotimeve të aprovuara dhe sa është i atyre të refuzuara. Në fund, vetëm fletëvotimet e aprovuara numërohen”, ka thënë Elezi.
