FIFA ka arritur një marrëveshje për një ndryshim të madh që prek të gjitha 48 kombëtaret pjesëmarrëse në Botërorin 2026, pak para fillimit të turneut.
Pavarësisht se Botërori është vetëm rreth 45 ditë larg, organizatorët po vazhdojnë të marrin vendime të rëndësishme, sidomos pas rritjes së numrit të ekipeve nga 32 në 48.
Një nga çështjet kryesore ka qenë ajo e taksave dhe logjistikës.
Vetëm 18 nga 48 vendet pjesëmarrëse kanë marrëveshje për shmangien e taksimit të dyfishtë me SHBA-në, që do të thotë se pjesa tjetër mund të përballet me kosto të larta financiare gjatë turneut.
Në këtë kontekst, FIFA ka konfirmuar se është në diskutime për rritjen e të ardhurave dhe shpërblimeve për pjesëmarrje.
Sipas deklaratës zyrtare, kjo përfshin:
rritjen e pagesave për të gjitha kombëtaret e kualifikuara
rritjen e fondeve zhvillimore për të gjitha 211 federatat anëtare
FIFA tha se Botërori 2026 do të jetë “historik” në aspektin financiar dhe se organizata ndodhet në gjendjen më të fortë financiare ndonjëherë, përmes programit të saj zhvillimor “FIFA Forward”.
Në dhjetor, FIFA njoftoi një fond rekord shpërblimesh prej 727 milionë dollarësh (539 milionë paund), ku çdo kombëtare do të përfitojë të paktën 10.5 milionë dollarë (7.8 milionë paund), ndërsa fituesi i 2026 FIFA World Cup do të marrë 50 milionë dollarë (37 milionë paund).
Megjithatë, pas bisedimeve të mëtejshme mes FIFA-s dhe federatave kombëtare, pritet që fondi i shpërblimeve të rritet edhe më shumë. Sipas “The Guardian”, përveç rritjes së shpërblimeve, do të shpërndahen edhe fonde zhvillimore për të gjitha 211 federatat anëtare të FIFA-s.
Sipas njoftimit, vendimi përfundimtar do të konfirmohet pas mbledhjes së Këshillit të FIFA-s në Vankuver të Kanadasë.
Megjithatë, organizata nuk ka arritur të sigurojë përjashtime të reja nga taksat, siç kishte bërë në disa turne të mëparshëm, gjë që mbetet një shqetësim për disa federata pjesëmarrëse./GazetaExpress/
